Ditulis Mujiprast
PURWOKERTOKITA. COM, BANJARNEGARA-Jurusan Rekayasa Perangkat Lunak (RPL) SMKN 1 Bawang Kabupaten Banjarnegara kerja sama karo Konsorsium Desa Pintar, ngembagna Sistem Informasi Desa (SID). SMK 1 Bawang sing kawentar “Skanza” kerja sama karo Konsorsium Desa Pintar Kabupaten Banjarnegara, sing ngampu 266 desa se-kabupaten.
Kepala SMK Negeri 1 Bawang, Dra Widiastuti MM, ngendika, menawa kemajuan teknologi gawe ringkes birokrasi sekang pemrentah pusat, provinsi, kabupaten, kecamatan gutul desa. Kabeh jaringan pemrentahan jaman siki dehubungna daning teknologi.
“Mula kuwe, SMK 1 Bawang melu keceluk kon darma bekti maring desa. Wujude kerja sama karo Konsorsium Desa Pintar gawe utawa ngembangna SID uga peningkatan keterampilan maring operator sing nang desa. Malah siswa jurusan RPL melu mudhun langsung maring masrakat, mbantu lang ndampingi desa,” jelasa Ibu Widiastuti.
Program SMK Membangun Desa, ujare Ibu Widiastuti, tujuane golet terobosan lan sinergi antarane sekolah lan pemrentah desa. Jurusan RPL SMK Skanza duwe pasilitas uga keahlaian sing cukup mumpuni nggo mengembangaken Sistem Informasi Desa bareng karo Konsorsium Desa Pintar.
“Warga Skanza kepengin aweh solusi masalahe bangsa, kawitane sekang masalah nang desa. Sistem aplikasi sedurunge akeh kekurangan sing pog-poge ngganggu proses pelayanan maring masrakat. Mbarang digarap bareng-bareng, pelayanan dadi lewih cepet,” imbuhe.
Teguh Giana, sekang konsorsium Des, ngendika, menawa SID kuwe wujude aplikasi utawa website, sing isine informasi penting. Mulai sekang data penduduk, layanan publik, kegiyatan, program desa, ukum, lan kabeh sing ana gandheng-cenenge babagan desa.
“Konsorsium Desa Pintar hadir banget seneng olih sokongan sekang SMK sing wuude pendampingan uga Pelatihan Administrator Sistem Informasi. Pengembangan ekosistem desa digital penting banget nggo ngundhanka pelayanan maring masrakat nang jaman teknologi kiye,” ujare.
Salah sijine guru Skanza, Pak Faozan Mahanani, njelasna, murid-muride wis padha nyebar maring desa, mbantu mlakune SID.
“Bocah padha seneng bisa melu bekti maring desa. Kejaba nggolet pengalaman, ilmune langsung depraktekna lan nyata kanggo langsung tumrap masrakat,” ngendikane Pak Guru sing ahli komputer kiye. (Muji Prast).
