MU Menang 2-0, Carrick Bungah

Sport32 Dilihat
Michael Carrick, pelatih sementara Manchester United. /Foto: Dok. Manchester United

PURWOKERTOKITA.COM, Manchester – Manchester United menang 2-0 nglawan Villareal neng Liga Champions, Rebo esuk (24/11/2021). Gol MU diceplosna Cristiano Ronaldo karo Jordan Sancho neng menit-menit akhir babak keloro.

Penggemar MU mesti wis trataban, sebab ngasi menit 75 punjul babar blas ora ana gol. Padahal kie ibarate laga penentuan urip mati.

Mbarang menit 78, Ronaldo mnyeplosna gol. Asale sekang kiper Villareal sing mandan lengob, bal dioper maring bek balane dewek sing lagi dikawal musuh.

Ya bale direbut, diempakna Ronaldo. Lah bal sing wis neng ngarep gawang ya kur disontek tok neng Ronaldo, mlebu. Skor 1-0 nggo MU.

Mbarang bisa gawe gol, Carrick keton jempalitan bungah ora karuan. Secara, Carrick kan lagi dadi sorotan bar Ole Out. Nah bar menang kie, deweke ya bisa disebut lolos sekang ujian pertama.

Ujiane masih akeh, umpamane nyelametna MU ben mlebu zona champions, aja ngasi mlorot maring zona degradasi.

“Moga-moga kie dadi awal sing seger,” ujare Carrick pas diwawancara wartawan.

Kaya-kayane penggemar MU sing nonton neng umah karo krodongan sarung ya melu jimprakan seneng ora lumrah.

Ya wajar, kepriwe ora bungah wong wis pirang perandingan MU keok terus. Pemaine, nek jere Paul Scoles, pada kesed-kesed. Padahal bayarane selangit.

Gol keloro diceplosna Sancho. Pemain enom sing agresif. Main neng sayap kanan. Bolak balik gawe repot bek Villareal.

Ora pati sue seuwise gol pertama, Sancho olih umpan trobosan sekang sayap kiri, kontrol satu dua sentuhan, bar kue langsung sikat, bresss… tlarap, bale melesat maring sisi kiri gawang Villareal. Goool, 2-0.

Wis bar gol keloro isine mung gonta ganti pemain nggo ngulur wektu. Sing nelangsani ya Juan Mata. Nembe bae mlebu wis priit, rampung. Ya ora papa, gajine akeh ikih. Wis ya, semene bae gole nggedebus.

Tinggalkan Balasan